PLAN DIRECTOR CONTRA O ACOSO ESCOLAR


O encargado de zona da Garda Civil veu hoxe falar ao alumnado máis novo do centro sobre o fenómeno social do acoso escolar. Afortunadamente, cada día existe máis conciencia sobre os efectos perniciosos que as condutas de acoso poden ter sobre a saúde psico emocional das persoas e, en particular daquelas que están no proceso de maduración psicolóxica. Esta indefensión das persoas máis novas vese hoxe agudizada polo uso das novas tecnoloxías de interacción social que, lamentablemente, borran as fronteiras entre o público e o privado e fan máis intensivas as crueis estratexias de acoso. Por iso é absolutamente imprescindible abordar esta problemática dentro e fóra do espazo escolar para que a rapazada poida visualizar o sufrimento e adoptar estratexias adecuadas para facerlle fronte. É obvio que esta experiencia de hoxe debe ser complementada e continuada con outras actividades ao longo do curso.


Comentarios